Società da Musica Ftan
Cordial bainvgnü sün nossa pagina d'internet
Herzlich willkommen auf unserer Internetseite
Actual:
Ün di pa pumpa, musica instrumentala, costüms engiadinais ed üna bella feista fin tard aint pella not.
Quai es stat il Schüschaiver 2026!
Minch`on dürant l`ultima fin d`eivna avant il mais Favrer vain festagià sü Ftan la tradiziun dal Schüschaiver. La bunura es la juventüna da Ftan in gir cun charin e chavagl. Els van a far laina a la veglia. Chi chi tschüffa lura ils bös-chs schmers, vegn decis la davomezdi cun trar la büs-cha.
Ma avant quai ston ils giuvnots amo ir a trar aint il costüm engiadinais. Perquai cha avant quai stà amo "la pera" sül programm.
Eir pro "la pera" sto gnir trat la büs-cha. Là vaja lura per chattar oura chenün giuvnot chi ha l`onur da far la pera cun chenüna giunfra. Davo vaja insembel culla società da musica in fuorma da cortegi tras cumün. La pera da quist`on d`eira cun 43 giuvnots e giunfras usche gronda, cha la musica veiva da spostar la partenza dal cortegi vers inavant. Ed eir scha l`ultim toc fin sün scoula es stat tant per la musica (chi veiva da sunar e marchar amunt) sco eir pella giventüna (chi veiva forsa fingià fat ün zichin feista ouravant) üna dretta sfida, es il cortegi stat üna belezza!
Per quist Schüschaiver veiva la società da musica organisà la feista insembel culla juventüna aint in sala polivalenta.
In quel connex ans laina ingraziar in prüma lingia pro noss comembers; chi han güdà davant e davo las culissas, a drizzar aint la sala, cun far tuortas a chasa, a far pront ils pasts da jantar e da tschaina gio'n cuschina dalla sala, cun servir bavrondas, cun rumir gio maisas e natüralming cun rumir sü e pulir darcheu tuot.
Sco prossem laina dir grazia fich a la juventüna da Ftan! Grazia fich cha no vain pudü esser part da quista bella tradiziun e cha no vain pudü manar il cortegi da Ftan Pischen fin sün chasa da scoula.
Grazia fich a la Chapella Tasna, chi ha fat musica pel bal tradiziunal dürant la davomezdi jo`n sala.
Grazia fich a DJ Blacky per manar la feista cun musica fin tard aint pella not.
E finalmaing laina dir grazia a tuot quels chi han visità il Schüschaiver 2026, chi han jodü la feista e chi vegnan prossem on forsa o sgüra darcheu!
Salüd musical
La socità da musica Ftan